Audio PDF
कविश्री भूधरदास
Kaviśrī Bhūdharadāsa
ते गुरु मेरे मन बसो, जे भवजलधि जहाज |
आप तिरें पर तारहीं, ऐसे श्री ऋषिराज |
ते गुरु मेरे मन बसो, जे भवजलधि जहाज ||१||
Tē guru mērē mana basō, jē bhavajaladhi jahāja |
Āpa tireṁ para tārahīṁ, aisē śrī r̥ṣirāja |
Tē guru mērē mana basō, jē bhavajaladhi jahāja ||1||
मोह-महारिपु जानिके, छांड्यो सब घर-बार |
होय दिगम्बर वन बसे, आतम-शुद्ध विचार |
ते गुरु मेरे मन बसो, जे भवजलधि जहाज ||२||
Mōha-mahāripu jānikē, chāṇḍyō saba ghara-bāra |
Hōya digambara vana basē, ātama-śud’dha vicāra |
Tē guru mērē mana basō, jē bhavajaladhi jahāja ||2||
रोग-उरग-बिल वपु गिण्यो, भोग-भुजंग समान |
कदली-तरु संसार है, त्यागो सब यह जान |
ते गुरु मेरे मन बसो, जे भवजलधि जहाज ||३||
Rōga-uraga-bila vapu giṇyō, bhōga-bhujaṅga samāna |
Kadalī-taru sansāra hai, tyāgō saba yaha jāna |
Tē guru mērē mana basō, jē bhavajaladhi jahāja ||3||
रत्नत्रय-निधि उर धरें, अरु निरग्रन्थ त्रिकाल |
मार्यो काम-खबीस को, स्वामी परम-दयाल |
ते गुरु मेरे मन बसो, जे भवजलधि जहाज ||४||
Ratnatraya-nidhi ura dhareṁ, aru niragrantha trikāla |
Māryō kāma-khabīsa kō, svāmī parama-dayāla |
Tē guru mērē mana basō, jē bhavajaladhi jahāja ||4||
पंच-महाव्रत आचरें, पाँचों-समिति समेत |
तीन-गुप्ति पालें सदा, अजर-अमर पद हेत |
ते गुरु मेरे मन बसो, जे भवजलधि जहाज ||५||
Pan̄ca-mahāvrata ācarēṁ, pām̐cōṁ-samiti samēta |
Tīna-gupti pālēṁ sadā, ajara-amara pada hēta |
Tē guru mērē mana basō, jē bhavajaladhi jahāja ||5||
धर्म धरें दशलक्षणी, भावें भावना सार |
सहें परीषह बीस-द्वे, चारित-रतन भंडार |
ते गुरु मेरे मन बसो, जे भवजलधि जहाज ||६||
Dharma dharēṁ daśalakṣaṇī, bhāvēṁ bhāvanā sāra |
Sahēṁ parīṣaha bīsa-dvē, cārita-ratana bhaṇḍāra |
Tē guru mērē mana basō, jē bhavajaladhi jahāja ||6||
जेठ तपे रवि आकरो, सूखे सरवर-नीर |
शैल-शिखर मुनि तप तपें, दाझे नगन-शरीर |
पावस रैन डरावनी, बरसे जलधर-धार |
तरुतल-निवसें साहसी, चाले झंझावार |
ते गुरु मेरे मन बसो, जे भवजलधि जहाज ||७||
Jēṭha tapē ravi ākarō, sūkhē saravara-nīra |
Śaila-śikhara muni tapa tapēṁ, dājhē nagana-śarīra |
Pāvasa raina ḍarāvanī, barasē jaladhara-dhāra |
Tarutala-nivasēṁ sāhasī, cālē jhan̄jhāvāra |
Tē guru mērē mana basō, jē bhavajaladhi jahāja ||7||
शीत पड़े कपि-मद गले, दाहे सब वनराय |
ताल तंरगनि के तटे, ठाड़े ध्यान लगाय |
ते गुरु मेरे मन बसो, जे भवजलधि जहाज ||८||
Śīta paṛē kapi-mada galē, dāhē saba vanarāya |
Tāla tanragani kē taṭē, ṭhāṛē dhyāna lagāya |
Tē guru mērē mana basō, jē bhavajaladhi jahāja ||8||
इह-विधि दुद्धर-तप तपें, तीनों-काल-मँझार |
लागे सहज-सरूप में, तनसों ममत-निवार |
ते गुरु मेरे मन बसो, जे भवजलधि जहाज ||९||
Iha-vidhi dud’dhara-tapa tapēṁ, tīnōṁ-kāla-mam̐jhāra |
Lāgē sahaja-sarūpa mēṁ, tanasōṁ mamata-nivāra |
Tē guru mērē mana basō, jē bhavajaladhi jahāja ||9||
पूरव-भोग न चिन्तवे, आगम-वाँछा नाहिं |
चहुँगति के दु:ख-सों डरें, सुरति लगी शिवमाँहिं |
ते गुरु मेरे मन बसो, जे भवजलधि जहाज ||१०||
Pūrava-bhōga na cintavē, āgama-vām̐chā nāhiṁ |
Cahum̐gati kē du:Kha-sōṁ ḍarēṁ, surati lagī śivamām̐hiṁ |
Tē guru mērē mana basō, jē bhavajaladhi jahāja ||10||
न रंगमहल में पोढ़ते, न कोमल-सेज बिछाय |
ते पश्चिम-निशि भूमि में, सोवें संवरि काय |
ते गुरु मेरे मन बसो, जे भवजलधि जहाज ||११||
Na raṅgamahala mēṁ pōṛhatē, na kōmala-sēja bichāya |
Tē paścima-niśi bhūmi mēṁ, sōvēṁ sanvari kāya |
Tē guru mērē mana basō, jē bhavajaladhi jahāja ||11||
गज चढ़ि चलते गरव सों, सेना-सजि चतुरंग |
निरखि-निरखि पग ते धरें, पालें करुणा-अंग |
ते गुरु मेरे मन बसो, जे भवजलधि जहाज ||१२||
Gaja caṛhi calatē garava sōṁ, sēnā-saji caturaṅga |
Nirakhi-nirakhi paga tē dharēṁ, pālēṁ karuṇā-aṅga |
Tē guru mērē mana basō, jē bhavajaladhi jahāja ||12||
वे गुरु चरण जहाँ धरें, जग में तीरथ जेह |
सो रज मम मस्तक चढ़ो, ‘भूधर’ माँगे एह |
ते गुरु मेरे मन बसो, जे भवजलधि जहाज ||१३||
Vē guru caraṇa jahām̐ dharēṁ, jaga mēṁ tīratha jēha |
Sō raja mama mastaka caṛhō, ‘bhūdhara’ mām̐ge ēha |
Tē guru mērē mana basō, jē bhavajaladhi jahāja ||13||
* * * A * * *
